Na kazeg nag eal
Na buoc’h na leue
Na dañvad na menn
Na yar nag evn
Na kog da ganañ
Da c’houloù-deiz
Na doc’h ebet gwisket e seiz
Na koulin e foulin
Lufr ha dous ha klouar
Aet int an eil war-lerc’h egile
Gant un tamm eus va c’halon
Da heul pep hini…
Marv Fousou. Marv Fido
Marv Stourm ha Pigoù
Kollet Kaval, e pelec’h ?
Kollet Ailil mab Lydaw…
Chom ‘ra Fionn hag he bugale
Hag ar gazhez kozh
Liv da vanniel Breizh…
Poan dezho o trec’hiñ
War al logod hag ar razhed
O korfata va diwezhañ eost
Ha bremañ : tro an traoù divuhez
Benvegoù. Beselloù. Ostilhoù
Ar Podfer bras a gant litrad
A garge an hanter eus an oaled
Aet eo ivez d’e dro.
Hag ar plouz. Hag ar foenn ?
Emaint aet en teil.
Ar bete, ar pato aet e yod…
Labour ar glav hag ar skorn.
Goullo ar c’hrevier
Goullo al leur
Goullo an oaled
Dismantret pep tra
Dor ebet mui
Ar glav o treuziñ an toennoù
An drez o wriat ar c’haeoù
Ar spern-du oc’h aloubiñ
Pep kleuz. Pep lanneg lann-pil.
Ar gwez o vont e gouezoni.
An toulloù-kirri distouv
An hentoù-kirri stouvet.
Ar prad o treiñ e bouilhenn
Ar verjez e strouezheg
Al liorzh e linadeg.
— Piv tamall ?
— Tri balevarzh-kantved, war-nes
Eo padet va stourm.
— Ha stourm va rummad —
Gourc’hemenn an Aotrou eo : Stourm
Met ne bromet ket an Trec’h atav.
— Pe mallozh ‘ta zo kouezhet
War hor Bro ?
War hon Lignez ?
War hor Gouenn ?
— An arallekadur ?
Ar Burtul gall !
Evet eo gantañ
Gwad ar Breizhad…
Dinerzh. Digalon. Diyoul. Hualet…
Dirak al labour ramz : an adsav !
An adsav ?
— Youl en empenn. Nerzh en divrec’h
Feiz er Galon
Ha Doue a-du ganeomp.
Ra vezo.
Goañv 1979
