Bloavezh da dit Mabig Jezuz
Bloavezh mat hag evurus !
— Ur bugel pa vez karet
‘Vez bepred evurus —
Ra vezi Te karet
Gant holl Bobloù an Hollved
Bugelig Doue !
Gant holl vugale mab-den,
Ar vugaligoù du o c’hroc’hen
Ar vugaligoù wenngen
An Indianed bihan ruz
Sinaiz melengroc’henet
Holl Breudeur dirazout.
Ra da garo ivez Mabig
Bugale an Azen
Ha bugale an Ejen
An oan. Ar menn. Ar bouchig
Hag ar c’holined a bep ouenn
Labousedigoù an oabl
Ha peskedigoù ar mor.
Gouezidi bihan ar C’hoad-meur
Amprevanigoù ha garvuhezeged
An douar hag an dour
Ra da garo ivez ‘n e giz
Bed hoalus ar Plant :
Geotennig ha bleuñvennig,
Gwezennig ha bezhinig
Ra da garo Bed ar Vein
Dilavar ha difiñv
Da garo stered an Ebr
— C’hoarezed sterenn ar C’hraou —
Al Loar disliv hag an Heol klouar,
Amzer Nedeleg,
Ra gano dit pep hini e Levenez
E nouelenn a Garantez.
Bloavezh da dit Mabig Jezuz !
Deiz kentañ ‘r bloaz 1971
